Herson ve Tavriya guberniyaları

Ukrainanıñ cenübide guberniyalarnıñ meydanğa kelüv tarihı.

XVIII asırnıñ soñunda Rusiye imperiyası Töben Zaporojje Qoşunınıñ ve Qırım hanlığınıñ ukrain topraqlarını zapt etti. Bu topraqlardan, esasen, balaban Novorossiya guberniyası teşkil olundı, onı 1802 senesi oktâbr ayında üç guberniyağa böldiler: Yekaterinoslav, Nikolayev ve Tavriya.

Nikolayev guberniyasının adı 1803 senesi mayıs 15-te Herson guberniyası olaraq deñiştirildi ve merkezi Herson oldı. Bazı qısmiy deñişmeler ile bu territorial-memuriy bölüv yüz yıldan ziyade yaşadı. Herson guberniyası Özü (Dnepr) özeninden Turla (Dnestr) özeninecek ve ukrain Ormançölünden Qara deñizgecek olğan keñliklerni qaplap ala edi.

Tavriya guberniyasınıñ haritası. 1822 s.

Tavriya guberniyasına, merkezi Aqmescit olğan, Qırım yarımadası ve Özü (Dnepr) özeniniñ Sol qırağından Qara ve Azaq deñizleri yalısınaca materik topraqlarınıñ bir qısmı kire edi. Zemaneviy Herson vilâyetiniñ terkibine Tavriya guberniyasınıñ sabıq Dnepr uezdiniñ bütün territoriyası ve Melitopol uezdiniñ bir qısmı kire. Onıñ içün olarnı ananeviy sürette Şimaliy Tavriya, Tavriya diyarı dep adlandıralar.

Eki cenübiy guberniyanıñ coğrafik qomşulığı olarnıñ başından keçirgen tarihiy vaqialarnıñ ortaq oluvını, sıqı iqtisadiy munasebetlerni, medeniy ve maneviy ayatnıñ yaqınlığını çoqtan berli belgiledi.