Sıvaş üstünde afeti
1978 senesi Sıvaş faciası: AN-24 yolcu uçağınıñ aviaqazası.
Valeriy Verhovskiy. «Krımska svitlitsâ» gazetası, 2018 senesi, 43-ünci sanı
Qırq yıl evel Qırımda bir facia yüz berdi. Aviaqaza neticesinde 26 adam elâk oldı: Aqmescit ve Kişinyovda ara qonuvlarınen Stavropolden İlbavğa (Lvivge) 6515 reysinen uçqan An-24 uçağınıñ ekipajı ve yolcuları.
Uçaq Stavropolden 1978 senesi oktâbrniñ 23-nde aqşam saat altıda uçtı. Stavropol ve Krasnodar ülkesi üzerinde uçuş problemsiz keçti ve iç bir şey belâ ketirecegini köstermedi. Faqat Keriç yarımadasına yaqınlaşqanda uçaq ögünde pütün bulutlılıq peyda oldı, onıñ cebbini aylanıp keçmek qıyın edi. Çerek saat pilotlar uçaqnı bulutlar içinde alıp bardılar, şundan soñ yerge buzlanuv aqqında bildiriş keldi, üstelik çoqça. Lâkin yüksekte buzlanuvnen aviatorlar daimiy surette rastkelişeler ve nasıl etip çaresini tapmağa bileler. Bu sefer ise bir qaç negativ amil birleşti.
AN-24 uçağı
Saat 19:40-ta sol motor işlemey qaldı, daa üç saniyeden soñ ise sağ motor da bozuldı. Uçaqnı planer rejiminde qondurmağa tırışmaq mümkün edi, yahşı ki, yaqınlarında bir qaç uyğun sızıq bar edi — arbiy aerodromlar: Bagerovo, İslâm Terek, Canköy, Sarabuz. Dünya vatandaş aviatsiyası tarihı, pilotlar uçaqnı suvğa qondırğan (atta okean ortasında) ve bunen yolcularnı qurtarğan bir çoq misalni de bile.
Uçaq endi ameliyatta idare etilmey edi, ve Seyitler rayonınıñ Omelyanivka köyünden uzaq olmağan yerde 50˚ köşe ile ve yüksek suratta Sıvaşqa tüşti... İç kimse qurtulmadı.
Qaza al-şaraitini teşkerüv neticesinde qayd etildi ki, eñ esas sebep — ekipajnıñ motorlarda ava toplağan yerlerni isitilmesini vaqtında qoşmağanı oldı. Uçaq qalıñ bulutlarğa kirgende, bunı yapmaq içün endi keç edi.